Per ils dretgs umans. En tut il mund. La Societad per ils pievels periclitads è ina organisaziun internaziunala per la protecziun dals dretgs umans. Sias finamiras principalas èn da promover tant en Svizra sco en l'entir mund l'encletga per la diversitad culturala, etnica e religiusa e da proteger minoritads persequitadas. Nus infurmain. Nus rapportain davart ils pievels periclitads e documentain violenzas dals dretgs umans. Nus tractain temas che na cumparan en la pressa ubain en l'agenda politica. Nus organisain acziuns e campagnas per preschentar nossas miras ad in public pli vast e mettain a disposiziun a persunas interessadas ina documentaziun extendida. Tras nossa lavur da sensibilisaziun survegnan carstgauns persequitads ina vusch. Nus politisain. Nus prendain partida per ils carstgauns spogliads da tut lur dretgs e per las unfrendas da genocids. Tras noss contacts en il parlament e cun las autoritads pretendain nus che la Svizra surprendia responsabladad pertutgant ils dretgs umans. Sco organisaziun cun status consultativ tar il Cussegl economic e social (ECOSOC) da la ONU a Genevra defendain nus noss interess era sin nivel internaziunal. Nus gidain. Nus sustegnain en tut il mund projects en favur da victimas da guerra e da violenza. Noss engaschi per las minoritads ed ils dretgs umans vegn sustegnì da la populaziun civila e d'insaquantas organisaziuns. La Societad per ils pievels periclitads s'engascha era vinavant per che las culturas e las tradiziuns da pievels periclitads possian surviver. Quai pudais vus far. Cun voss sustegn è nossa lavur pir pussaivla. Daventai commembers da la Societad per ils pievels periclitads ed ans gidai uschia da proteger carstgauns basegnus e da crear in mund avert per la ritgezza dad ina diversitad culturala. Tut engaschi quinta, er il voss. La diversitad è ina ritgezza.